Thursday, October 22, 2015

சிதறும் நினைவுகள்..



ஆயுதங்களை என்னதான்
கழுவியெடுத்தாலும்
ஐப்பசி மழை தன் பங்குக்கு
வந்து விழுகிற ஆயுத பூஜைகள்
எப்போதும் ஈரமானவை,

பப்ளிக் எக்ஸாமுக்கான
பிராக்டிக்கல் நோட்டின்
நடுமத்தியில் பாட்டி சந்தன குங்குமமிட்ட
ஆயுத பூஜையொன்றில்
சரஸ்வதி
தீவிரமாய் வேண்டப்பட்டாள்,
சித்தப்பாவின் டிவிஎஸ் 50,
துருவேறிய சைக்கிள்,
பிபிஎல் டிவி, மண்வெட்டி
என தொடங்கி ஆடு மாடுகளையும்
குட்டி குளுப்பானுகள் அலங்கரித்த போது
பொங்கலாக மாறியதொரு
ஆயுத பூஜை,

ஆயுத பூஜைகள்
பற்றிய பால்ய நினைவுகள் யாவும்
பெருநகரின் மூச்சு முட்டும்
தெருவொன்றில்
ஆட்டோக்காரர்கள் உடைக்கும்
பூசணியாக சிதறிக்கொண்டிருக்கிறது..

1 comment: